有性趣：男僕咖啡店惹爭議

少女瞓身追捧

事緣早前日本有電視台做咗個關於男僕咖啡店嘅專題節目，指當中有部分已變質成牛郎店。呢類從傍晚營業到子夜時分，並集中喺秋葉原、歌舞伎町等地方嘅咖啡店，男侍應不但清一色係美少男，更會同女僕咖啡店一樣跟客人有交流，因此便出現一啲人氣男侍應。正因為佢冇牛郎店嘅特別接待服務，故此入場人士年齡冇限制，未成年女性亦可以去光顧。此外，店內男侍應唔單止促銷貴價酒，更靠周邊產品嚟搵錢，所以佢哋會不停游說女客人大量消費，結果有部分未成年女性為追捧心儀男侍應便去賣身搵錢。呢個節目一出就引嚟網民熱議，有人覺得呢類咖啡店應該受規管，有人表示並非所有男侍應都會谷客人消費，亦有人認為問題核心，在於呢啲咖啡店係月薪制定佣金制，只要規定前者便減少問題出現，唔知大家又點睇呢？