有性趣：坐餘溫櫈會染性病？

對於女性坐餘溫座椅會容易感染性病嘅講法，大多嚟自老一輩人口中，聽起嚟真係幾令女士心驚。不過實情係除非該女士冇着褲或裙，同時又冇着底褲，而上一手座位嘅人亦係如此，咁先有機會傳染到性病。事實上，有超過95%嘅性病，都係經過性接觸傳播。

其實喺唔好坐餘溫座椅嘅坊間傳聞中，亦有同男士有關，而最常聽到嘅就係如果坐呢啲餘溫座椅會生痔瘡。呢個講法其實仲無稽，首先痔瘡本身並不具傳染性，唔會因為上手嘅臀部餘溫，而令你生痔瘡。其次係痔瘡嘅出現，其實係因肛腸部位血液循環唔暢順，導致血液回流障礙，所產生嘅靜脈曲張而成，歸根究柢其實係長期坐喺度唔郁，先係痔瘡出現嘅最大關鍵，同坐落去餘溫座椅根本一啲關係都冇。