有性趣：狗脊補肝腎

狗脊係蚌殼蕨科植物金毛狗脊嘅乾燥根莖，所以又可稱為金毛狗脊、金毛狗、金狗脊，主要產於福建、四川、雲南、廣西等地。

喺中醫學角度，狗脊味甘、苦，性溫，歸肝經、腎經，據《本草綱目》嘅記載，佢可以「強肝腎，健骨，治風虛。」另外，《本草經疏》同《本草再新》都有提及佢嘅好處，總括而言，具有補肝腎、強腰脊、祛風濕等作用，可以用於治療腰膝痠軟、下肢無力、尿頻、遺尿、風濕痹痛等症。

狗脊與桑寄生兩者都屬祛風濕強筋骨嘅材料，同歸肝腎經。其中狗脊性溫，補益肝腎嘅作用較佳，桑寄生則性平，擅長養血而補肝腎，將兩者搭配豬尾煲成湯水，就可以補肝腎、強筋骨，有效治腎虛同遺精。