政情：議員表現 市民勁彈 李慧琼包尾大幡

香港研究協會喺上月23日至本月5日，以隨機抽取電話號碼嘅形式，成功訪問1,074名18歲或以上市民，就今屆立法會議員嘅表現進行評分，當中以「非常不滿意」為1分、「不滿意」為2分、「一般」為3分、「滿意」為4分、「非常滿意」為5分；結果喺「受訪者對各組別立法會議員的工作表現」評分中，選委會界別得1.70分，功能界別得1.71分、地區直選就得1.72分，3者皆較今年2至3月所進行嘅同類民調，評分都有所下降。

至於「受訪者對所屬選區立法會議員表現」中，儘管20位地區直選議員當中有18人嘅評分錄得升幅，但俱低於3分嘅水平，新界西北嘅周浩鼎雖然最高分，都只不過係2.72分；港島東嘅梁熙評分即使由上次嘅1.77上升至今次嘅1.88，分數仍屬谷底徘徊，排尾二；然而低處未算低嘅係上次得分有2.12嘅李慧琼，今次跌得好「甘」，得分1.86咋！

由5項工作組成嘅「受訪者對全體立法會議員的工作表現」評分，得「落實一國兩制」同「監察政府施政」兩項嘅評分較上次輕微上升，分別係前者由2.03升至2.05，以及後者由1.82升至1.91；而「參政議政」同「回應市民訴求」就同得1.76分；「推動政府有效施政」就由1.82跌至1.75分，連串數字反映公眾眼中，議員處理呢幾項工作都未如理想。評分咁低，怕且班議員真係要檢討一下啦。