要聞港聞

光害約章冇牙力 累街坊影響作息

疫慌下百業蕭條,國際金融中心黯然褪色,之但係光污染卻依然璀璨奪目;有學術研究甚至指香港係全球光污染最嚴重嘅地方之一。有環團人士表示香港城市密集,廣告招牌燈光滋擾民居尤為嚴重;此外,加上近年光污染源多變化,包括LED嘅屏幕、廣告牌等,較傳統嘅霓虹燈更亮更閃,照具面積更大,對民居帶來嘅滋擾自然更大!
嗱!政府又話擬構建「宜居香港」,咁「愛民之心」有冇反映喺「勤政之意」上呢?見微知著,市區居民深受影響嘅光污染似未見落重墨喎!要不然何以推行逾6年嘅《戶外燈光約章》,至上月底先推行更新?要求機構須於晚上10點關掉所有裝飾、宣傳或廣告用嘅戶外燈光裝置;另外,所有約章參與者亦須提早1小時至晚上10時關掉LED閃動招牌和影視幕牆等動態燈光裝置,或將其轉為靜態模式,明年1月生效。
大哥,約章究竟有冇效呢?環境及生態局就話,整體而言,2021年光滋擾嘅投訴,佔環保署整體投訴僅約1.6%,該署收到投訴後,會向燈光裝置嘅負責人轉達關注,大部分都會盡量採取措施減少光滋擾。而戶外燈光工作小組認為,社會就光滋擾立法未有共識,冇迫切需要亦不易立法推出嚴苛措施,稱改善約章更務實喎!
真相是否如此?嗱,60多歲嘅關先生住喺旺角花園街一幢舊樓,窗戶對正商場一塊戶外LED屏幕廣告板,佢向環團表示,廣告板於兩年前設置,每晚一亮燈,燈光便直射入屋,形容「燦住對眼,15分鐘都頂唔順」,客廳、睡房即使落下百葉簾、遮光簾,惟燈光仍滲透家中;佢擔心強光會損害家人眼睛,甚至影響健康。仲有吖!有團體於10月底環保署宣布更新《約章》後,發現西洋菜南街由登打士街至旺角道一段,於晚上11點後仍有28家冇營業商戶嘅招牌等戶外燈光火猛亮着,當中多達26家並無簽署約章;餘下兩家雖有簽署約章,卻有違反承諾之嫌。
各位,事實充分證明,即使於現有《約章》下,已有參與者涉無遵守承諾,更多嘅係商戶未參與《約章》,深宵關門後招牌照亮燈照閃,難怪有環團質疑約章係「無牙老虎」,又指約章未規管亮度及照射方向,有旺角居民被附近商場嘅LED屏幕直射,光度超出國際標準15倍,有乜可能唔損害睡眠質素吖?
政府數據雖然顯示近年光滋擾投訴減少咗,估計係因疫慌下經濟差,商戶紛紛執笠所致;依家食肆及酒吧復准通宵營業,霓虹招牌難保不會又再長時間閃亮,光污染再增見!是次政府叫商家靠約章自律,根本全冇牙力!功夫茶認為應立法規管實際啲,而立法後有關當局更應多些巡邏及執法,才可以達致有效管制光污染!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500