昔日東方政情：斷絕翁媳關係 容海恩封口拒提
議員容海恩尋日刊登聲明，稱與涉嫌違反《港區國安法》嘅家翁袁弓夷脫離翁媳關係。然而其聲明就遭到法律界人士質疑，指容此舉屬單方面個人表述，難言法律效力，倘決意斷絕關係，需涉事各方到法庭申請頒令。而容尋日傍晚出席公開活動時，對於相關提問都拒絕回應。另外，有網民發現容曾申報自己係獲認可嘅一般及家事調解員，希望佢盡快處理今次風波。
建制派嘅容海恩，同夫家嘅政治立場南轅北轍，其大姑袁彌望、小姑袁彌明及家翁袁弓夷都屬民主派。容於2016年加入新民黨，及後與該黨時任嘅政策總裁袁彌昌結婚，小姑袁彌明嘅丈夫林雨陽喺社交網站貼文，指「You are what you choose. 老婆、朋友有得揀。其他親戚要揀時，請好好選擇。」及至2020年，容出席節目談及元朗721事件，就同小姑隔空對罵。袁彌明直言同阿嫂「無嘢討論」，「企咗嗰邊就係是非不明，個良知係冇」；容則反駁指「我覺得佢都嘥氣，講咩良知，我冇良知咩，我覺得你嘅良知係錯，係咪先？各人有自己嘅良知，良知唔係電視機睇到呀嘛。」
袁弓夷稱畀新抱休番轉頭
至於容嘅夫婿袁彌昌，曾將自己嘅家庭形容為香港政治光譜嘅縮影，又指《港區國安法》立法後，擔心父親袁弓夷嘅言論可能令家庭難以團圓，指是悲劇但仍尊重父親嘅志願。
袁弓夷則喺尋晚嘅網台直播中，指昔日「休新抱就聽得多」，豈料依家竟然掉番轉！不過佢相信容刊登聲明，目的係保護自己及家人，指做法「有智慧」，呼籲大家切勿言語攻擊容海恩。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
