要聞港聞

笑看天下:冇事響急警有事扮聾啞

如果大家不善忘,當記得今年1月尾臨近新正頭,將軍澳有靈車跌出棺材,跌棺事件引起網民熱議。當時本報已有論者指出,如此奇災異象似撞邪!本來7‧1慶回歸25周年,即使香港上空冇有鳳來儀、天空唔見五彩雲氣盤旋都冇所謂,誰知林鄭原本諗住用嚟「躍動港島南」嘅珍寶海鮮舫竟於日前駛至南海西沙群島附近水域,話遇到風浪而沉沒喺逾千米深嘅海底!
珍寶海鮮舫葬身「怒海」引來唔少議論,有議員就覺得匪夷所思,皆因從各地天文台嘅數據顯示,當時風力輕微,只有2級微風,遠未達3號波嘅6級風力;既然水波不興,何以咁水皮話遇「風浪」而沉沒?海鮮舫忽變「海底王宮」,唔通海龍王生日想喺珍寶海鮮舫擺幾圍賀一賀?此時此刻,各種各樣嘅陰謀論傾巢而出!
更不可思議嘅係,夏至先嚟大停電!元朗一條鄰近港鐵朗屏站嘅中電電纜橋,日前忽然爆炸起火,火勢熊熊冒出大量烈燄濃煙,事故導致元朗、天水圍及屯門大停電,估計逾50萬市民受影響,近半新界西變成黑暗世界!
大停電令港鐵屯馬綫列車服務一度受阻,醫院亦因供電不穩,新界西醫院聯網轄下部分緊急病人需轉院;消防處接獲80多宗困升降機報告。此外,多個地區電訊網絡受影響,手機接收欠佳,甚至無法通訊。老朽有朋友家住40幾樓,因手機失聯,未知家中老父老母情況如何,情急之下,只好爬40幾層樓梯,佢形容當時喺一片漆黑中趕回家,恍如世界末日!
各位,今年3月政府失驚無神啟動緊急警示,原來只不過宣布將伊院改為專接收新冠病人嘅定點醫院!依家新界西因大停電而一片混亂,政府卻不動如山扮聾啞,只要求中電交報告,你話吹唔吹脹吖!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500