要聞港聞

笑看天下:逼人打針 進退失據

港府喺防疫措施上常被評為寬緊無度。像「疫苗通行證」日前進入第二階段,入餐廳、娛樂及公共設施等,大部分人均要接種至少兩劑疫苗,否則就不得其門而入。今個月底實施第三階段,屆時要打齊第3針,否則又係邊度都咪旨意去!這不太嚴苛及不近人情嗎?
講真,港人大部分守法到加零一,而且好識「執生」!呢嗱!之前未放寬晚上堂食,疫情尚處高峰期,好多食肆不論茶餐廳或大型酒樓餐飲,不是索性停業就係只做外賣,連早、午餐都只做外賣,自律到不得了!至於市民,見到疫情的確嚴峻,亦多自覺只外賣。所以話港人嘅自覺性,相對外國係高好多!是以第二階段及第三階段放寬,又何必着緊於是否打兩針或3針!應如本報所說:解禁啱時間,畀條生路行!
本報指出本港新冠感染率已穩定下降,每百萬人感染比率由上月15日嘅199人,急降至4月29日約56人,顯示放寬措施並冇出現疫情反彈現象。政府專家又指出港人因大規模染疫後,中招人數已逾百萬人,社會已經出現臨時免疫屏障,市民可暫鬆一口氣。
呢,有醫療界人士認同本港有空間進一步為社會及經濟「鬆綁」,之不過,政府此時卻進退失據,限制多多。事實上,西方國家已經唔當Omicron係嘢,「與病毒共存」成大勢,即使亞洲國家如新加坡、南韓、泰國、越南等,都為了加強經濟復甦步伐,大幅放寬防疫限制,泰國甚至准許未接種疫苗嘅旅客入境。老朽不敢奢望呢個政府會如此高瞻遠矚,之不過,逼針唔好逼到咁冇理性及無所不用其極,去逛商場去飲個下午茶,掃「安心出行」得喇!阿哥,畀條生路行!老朽真係唔想打第3針!我覺得兩針已夠用。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500