要聞港聞

笑看天下:開放酒吧 釋放活力

林鄭表示並冇放棄全民強檢,只係由於涉及大量資源,時機要掌握好,如果疫情尾段有效達成目標,例如可以通關,就一定會做全民檢測;佢又話最好可以預測疫情走勢以制訂抗疫工作,但恐怕現實冇呢個水晶球喎!
林鄭連「水晶球」都祭出嚟,呢招大有古人「予豈好辯哉,予不得已也」的意思,即使仲有3個月貨仔,佢真係每日都很有抗疫精神,冇一刻感到身心疲憊而影響工作!佢認為目前政府需要繼續建設設施,一定要減重症、減死亡、減感染!
事至如今,確診人數累計百萬人,第5波疫情死亡人數遠超政府處理遺體嘅能力,死得人多而鬧「棺材荒」!政府呢個時候先來「減死亡、減感染」,豈不予人哭笑不得之感?若然一切有「水晶球」指點,試問一眾防疫高官又如何值30、40萬人工一個月?古人說:無故而尤人,則人必不服!無故擺水晶球上枱,老朽也不服!
港產官僚做錯事,從來只見「A」字膊,卸得就卸,老朽從沒有見過一個高官會先找出自己嘅問題!一個有承擔嘅問責高官,理應向自己查找不足,找不到,再找,直至找到問題才肯罷休!如今,卻永遠不肯認己之不足,政策朝令夕改,錯咗就推給冇水晶球,果然淡淡定,有錢剩吓!
政府希望下月21日起一併放寬部分處所,所有食肆料獲放寬!之不過,首階段維持關閉酒吧,業界感失望,強調今年1月7日起被勒令停業,今年至今只營業咗6日,形容業界如置身「黑暗隧道」!老朽深表同情,疫情嚴峻時,政府下「禁酒令」,林鄭曾拋出金句:飲醉少少會有親密行為!唉,市民身心俱疲,若然開放酒吧可以令市民有番活力,說不定香港出生率有望回升,大好事也。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500