要聞港聞

港人長命變受罪 廢官來去得一句

常言道︰「長壽是福。」不過唔適用於今時今日嘅香港。隨着醫療科技發達、生活質素改善,港人愈嚟愈長命,本來係好事;偏偏因為港府無能,退休保障同安老政策遠遠追不上,結果人哋長壽可享福,港人長命就要捱窮。最弊係掌握港人福祉嘅勞福局局長羅致光,嚟嚟去去都淨係識叫人買年金,絲毫唔見改善政策嘅意思,港人睇唔到未來有咩希望,只有絕望,一言以蔽之︰「慘!」
話說根據政府統計處資料,2020年出生嘅男嬰可以活到82.90歲,女嬰更可達87.95歲,之但係羅致光尋日喺網誌上,長篇大論解釋統計處點樣嚴重低估咗港人未來平均壽命,而且文章劈頭就講明有關數據唔係用嚟滿足好奇心,而係作為唔少政策嘅分析工具。咦!隱隱約約感覺到局長好似有股怨氣噃。查實計算方式唔同啫,無話邊個啱邊個錯嘅。但既然局長擺出一副「眾人皆醉我獨醒」嘅樣子,少不免令人期待當局會點樣解決衍生出嚟嘅問題啦,點估到佢提出嘅解決方式得寥寥數句,簡單講就係買公共年金,咁好口才,唔做保險經紀真係嘥晒,為人為己,局長不如考慮吓轉行啦。
安享晚年又豈止「錢」咁簡單,社區服務、醫療護理、配套設施等無不息息相關。人口老化係大趨勢,偏偏港府愛理不理,結果就係居家養老無人照顧,公營安老院「排到死都未排到」,私營安老院又貴到畀唔起,搞到成班長者走投無路。眼見稍為有啲經濟條件嘅老人家選擇北上養老,港府不思過錯,反而順水推舟,冇諗到老人家願意返內地養老,皆因隔壁配套做得好。所謂「故土難離」,中國人傳統講究落葉歸根,抱住「生係香港人,死係香港魂」嘅老人家,實不在少數。
講返轉頭,港府多年嚟應對人口老化嘅問題,一味靠「金」解決;當初推出強積金,家吓又叫人買年金,核心思想離不開積穀防饑。只不過政策明顯有盲點,通俗啲講︰「鬼唔知阿媽係女人,有錢先得㗎!」家吓扶貧政策一鑊泡,港人已經變飢民,搵個銀仔刮痧都冇,仲點樣積穀呢?雖則話公共年金屬即期年金,一筆過繳付之後就鬥長命,但投保額少呢,回報得雞碎咁少,投保額高,長者又拎唔出,衰啲講如果唔長命,回報根本唔高,基本同投資冇分別,風險一樣由市民自行承擔,所以唔少老人家都寧願留個錢傍身。
嗱!公共年金好定唔好呢,真係見仁見智,之但係羅致光叫長者靠年金養老呢,就肯定不智。講到底,富貴人家何必愁,要擔憂肯定係基層長者。局長與其呃呃氹氹叫老人家「磅水」,大條道理轉移市民視線,不如做好扶貧同安老配套,或者落實全民退保仲實際啦。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500