要聞港聞

政情:城大校長 郭位跟隊走人

郭位(右)無回應記者提問。(陳嘉順攝) 郭位(右)無回應記者提問。(陳嘉順攝)
郭位(右)無回應記者提問。(陳嘉順攝)
2023年任滿唔續約
繼日前科技大學宣布校長史維將於明年十月提早離任後,本港另一所高等院校亦將有高層人事變動。城市大學校長郭位尋日代表校方出席一項簽署備忘錄嘅儀式,事後未有回應記者提問就急急腳鬆人,但其後該校嘅副校長就證實,郭位兩年後任期屆滿將不再續任。
城大副校長(發展及對外關係)李國安以大學發言人嘅名義發表簡短聲明,話郭位決定喺2023年5月卸任校長職務。佢又話該校亦根據校董會指示,成立遴選委員會進行國際招聘,以物色接任校長嘅人選。當在場記者追問郭位唔續約嘅原因,譬如係咪受壓,李國安冇回應就離開。
任內風波不絕
郭位係電子及能源可靠度專家,曾赴美國留學工作30幾年。佢由2008年起擔任城大校長,到依家已經10幾年喇,大學教育資助委員會主席唐家成就讚揚郭位積極推動城大喺創新、創業及研究方面嘅工作,尤其是城大設立首間動物醫學院,提供獸醫課程。之但係,郭位任內亦遇過唔少麻煩事,如2016年運動中心天花倒塌事件,而2019年嘅反對修訂《逃犯條例》風波肯定係極大嘅挑戰。儘管城大發生嘅暴力衝突,唔似得理大同中大咁嚴重,但城大校園仍遭入侵,校長辦公室受到惡意破壞,多處地方損毀。事後郭位聯同幾位副校長同秘書長等人聯署公告,譴責破壞行為,又揚言追究責任。
之不過,公告一出,郭位就遭到校內部分師生同埋校友批評佢「神隱」,跟住就有人將一首流行歌曲「二次創作」為《找郭位》並喺網絡散播,歌詞內容對郭位同城大極盡諷刺同奚落之能事,而城大都有學生跟住唱添,最終校方就揪出相關學生予以懲罰。
年屆70歲高齡
學生同校方關係變得緊張,郭位曾發表文章「解籤」,話好關心師生嘅安全同福祉,於是成立「緊急事故應變小組」向同學提供協調同支援嘅管道,但學生同外界嘅反應就似乎唔多收貨。雖然激烈嘅社會運動告一段落,但隨之而來嘅大學籌款,就令到郭位相當「頭痕」,早前佢曾向傳媒呻,話有商界人士認為校方縱容學生走上前線示威,託詞反悔原來嘅捐款承諾,甚至有人話想攞番捐贈嘅款項。另一方面,城大就連交換生都少咗,有部分就讀城大嘅非本地生,話唔想返港繼續學業。
到底郭位係咪眼見大學嘅棘手問題難以解決,而萌生去意呢?抑或佢有感已屆70歲高齡,想退下火線?咁就不得而知嘞!
李國安話校方成立遴選委員會物色接任校長嘅人選。李國安話校方成立遴選委員會物色接任校長嘅人選。
李國安話校方成立遴選委員會物色接任校長嘅人選。
郭位曾因校長辦公室受破壞,發公告揚言追究責任。郭位曾因校長辦公室受破壞,發公告揚言追究責任。
郭位曾因校長辦公室受破壞,發公告揚言追究責任。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500