政情：遭台灣黑幫毒打股壇「明燈」蕭若元被質食狗屎

現時身處台灣嘅網台負責人蕭若元惹血光之災。據了解，蕭日前喺台灣街頭被當地黑幫毆打，事後更被質食狗屎。未知雙方因乜嘢事結怨，亦唔知蕭現時嘅傷勢點樣？

蕭若元早年曾搞網兼炒股，點知一鋪清袋，近至上個月，佢家族旗下嘅易還財務仲錯炒洗倉股，4日內損手近285萬元呀！話說呢家公司早前公布，10月6日喺公開市場出售198.1萬股或0.201%華夏文化科技股份，每股沽貨價為1.2384元，出售造成帳面虧損約284.7萬元。

唔單止自己損手，佢以前經常預測股票走勢，但係講親嘅都唔掂，於是有股壇「明燈」之稱，可能唔少人誤跟佢嘅預測去買股票，最後搞到損手爛腳，唔排除因為咁有人就搵佢嚟洩憤嘞！

話時話，佢喺台灣都惹起好多是非。話說喺舊年年底，台灣因一名染疫嘅外籍機師傳染當地一名女子，令當地事隔8個月再出現本地個案，引起社會憂慮疫情再次反彈，而蕭就被發現喺台灣高鐵商務車廂中進行拍攝時冇戴上口罩。

車廂拍片冇戴口罩捱轟

佢喺社交平台上載嘅兩段影片分別同「英國脫歐」及「Apple電動車」有關，佢喺「英國脫歐」影片開首時，原本仍戴住口罩同觀眾打招呼，但幾秒後除低口罩，喺車廂內高談闊論近10分鐘。而在另一段長達8分鐘嘅影片中，佢身處於同一場景亦無戴上口罩。換言之，佢冇戴口罩歷時長達18分鐘。

但根據台灣高鐵公司規定，旅客進入車站時必須全程戴口罩，當地市民批評佢今次嘅行為已違規定。而喺事件曝光後，佢認錯同道歉，並刪除相關影片。

第一手消息請下載on.cc東網 iPhone/ iPad/ Android/

爆料熱線：

(852) 3600 3600

傳真：

(852) 3600 8800

SMS：

(852) 6500 6500

電郵：

網上爆料：

MMS：

政情：遭台灣黑幫毒打 股壇「明燈」蕭若元 被質食狗屎