政情：商戶因政見鬧鑊甘 邵家輝照幫申基金

話說疫情初期，曾有商戶因政治立場而鬧爆邵家輝，然而經濟低迷，該商戶終歸都要申請政府提供嘅支援基金。遭對方「鬧鑊甘」嘅邵諗咗諗，都係決定唔講政見、撇開個人恩怨，幫該商戶申請，仲話幫完之後，大家就冇再嘈交，畢竟市民最緊要都係有啖安樂茶飯。

講起任內發生乜嘢事令佢印象特別深刻，佢就話社會事件期間，唔少建制派人士被起底，而佢曾經試過因為有人揚言要去佢屋企，搞到要連瞓3晚酒店。今屆立法會因為延任，任期較歷屆長，佢笑言議會內冇留低遺憾，因為提出嘅好多條例都已經被否決咗喇，依然會選擇盡能力去做，亦相信業界見到自己有努力咁話喎。