政情：葛珮帆偕官員 落區探劏房戶

佢哋首先探訪咗單親劏房戶，媽媽同仔仔相依為命。薛永恒知道仔仔好鍾意數學，就鼓勵佢喺創新科技方面發展，仲話自己推動創科就係想為本港青年提供上流機會喎。之不過，疫情期間學校推行網上教學，關愛基金援助項目又已經結束，媽媽話冇能力為個仔買電腦，希望政府會出手幫助有需要嘅學生。

媽媽又話公屋申請咗6年都仲係冇消息，現在被迫捱貴租，住喺一個只有一鋪床嘅唐樓劏房，希望可以盡快上樓，改善生活環境。由於仔仔已讀緊中學，媽媽唔方便同佢瞓同一鋪床，只好自己瞓地下。薛就話明白佢哋嘅苦況，又話政府依家已大大加快興建公屋。EQ話自己都係單親家庭長大，鼓勵個媽媽唔好相信孩子會「輸在起跑線」，只要努力就會有前途。

事實上，政府長期都畀人批評不恤民瘼，政策離地。近排有多名局長落區探啲基層家庭，EQ就希望政府以後會多啲聽市民意見，推出更多便民、貼地嘅政策啦！