要聞港聞

創新藍圖有遠見 開發船灣淡水湖

一個城市嘅開發,其實都係如逆水行舟,不進則退。回歸逾24年,香港喺基建、覓地建公屋、旅遊景點等嘅發展,一潭死水;鬼咩!一眾庸官不是缺乏創意,就係怠政避事,又驚多做多錯,唉,畏首畏尾,身其餘幾?
東方恨鐵不成鋼,屢向無能政府獻上一個又一個精彩可行嘅藍圖,可恨庸官就係唔識寶,至今若然有幾個做到,香港都不至於頻年海島無建樹,四顧茫茫淚自揮吖!畀一河之隔嘅深圳愈甩愈遠!呢嗱,今東方又獻第11個藍圖——開發船灣淡水湖,令其成為建屋重鎮、填海造地、築家禽及淡水魚養殖場、建單軌列車接駁大埔交通等。要言之,構思不落俗套更具遠見,兼顧旅遊和建屋,為發展旅遊業帶來一番新景象!
東方呈獻給政府嘅藍圖,無不經過深思熟慮,今趟之藍圖11,倡議善用土地資源,建議發展位於大埔大美督嘅船灣淡水湖,佢係本港第二大水塘,亦係全球首個喺海中興建嘅水塘,位處八仙嶺及船灣郊野公園,面積逾1,200公頃,坐擁大片無敵海景,不論朝陽晚霞,掩映一樹柳彎腰,靚到絕!呢個淡水湖曾經係本港供水嘅主要來源;之不過,隨着東江水持續穩定供水給香港,佢嘅供水系統角色已日漸式微,係時候要變喇!
嗱!基於土地資源珍貴,東方建議方案有二。其一,係將三成面積涉約360公頃土地,興建一系列房屋,其餘地方可設水上活動。淡水湖西邊嘅船灣海範圍具發展潛力,料可釋出117公頃土地,並興建大壩接駁船灣淡水湖及馬屎洲。至於交通方面,淡水湖發展區將與環保概念貫穿,建議用高架單軌列車接駁大埔交通,單軌車可分兩條路線,一條沿着大埔海濱由大埔墟火車站延伸至汀角及船灣淡水湖一帶;另一路線則可穿越大埔工業邨,解決該區長期交通擠塞問題,並且實現綠色旅遊及綠色出行一體化。
方案二仲簡單,就係填平大埔區船灣淡水湖建新市鎮,呢個方案其實係早年土地供應專責小組研究嘅12個項目之一,可釋放1,200多公頃土地。當年的學者認同東方嘅藍圖,認為計劃「中間落墨」,填平約三成嘅淡水湖面積即可釋放出360公頃土地,用作建新市鎮亦符合經濟效益。事實上,東方嘅構思既帶動經濟又增加本地旅遊景點,同時若在此興建單軌高架列車,使曾經構思13載卻胎死腹中嘅計劃得以「重生」,更為香港新增一項觀光設施,何樂而不為?時光易逝,一個城市不與時並進,會變得老態龍鍾,令人不忍卒睹。香港,要充滿朝氣活力,東方藍圖11尤其幫到時刻躺平嘅政府!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500