要聞港聞

政情:勸長者防消費陷阱 覃德誠碰釘

覃德誠 覃德誠
覃德誠
營銷手法層出不窮,倘涉及利誘形式難免令人生疑。深水埗區議會主席覃德誠,日前發現青山道某商店還未正式營業,就不時透過免費派發紙巾,或象徵式收費「1蚊雞」廉售白米、生油等尋常物品,成功吸引大批長者變為保健產品嘅潛在顧客。
覃擔心當中有詐,曾勸領取或購買有關物品嘅長者要小心,殊不知對方竟指摘佢「病嘅又唔係你,你梗係唔着緊啦,人家關心我哋啫,你又話人哋呃錢,點解咁講嘢㗎?」
反被老友記指摘
大嘆好人難做嘅覃德誠話,呢間以日文為店名嘅商店作風神秘,大多數時間重門深鎖,並以長者為主要對象。其實該店過往亦曾於區內多次出現,先以派發小禮物或極低價出售生活物品以吸引客人上門,繼而舉辦講座,游說長者購買未必合用、但售價高昂嘅保健產品。而長者即使後來發覺「中伏」,亦往往追討無門,事關涉事嘅商店只係短期租約,而就算未搬走,亦因交易過程屬於「願買願賣」,執法機構難以跟進。
覃德誠冀長者排隊攞「着數」前要諗清楚,邊有咁大隻蛤乸隨街跳?更何況後生搵錢咁辛苦,人哋兜售嘅健康產品係咪一定啱用、同一定要買呢?覃又指,兩日前該店正式營業,向長者推銷嘅酵素食用產品,售價較巿面上同類產品貴上十幾倍!覃話已催促相關政府部門要正視問題,同時要求有關部門代表要喺下周二嘅區議會大會上交代。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500