要聞港聞

何物國殤一支柱 話係藝術阿茂識

支聯會早前宣布解散後,港大上周透過律師去信支聯會,要求尋日5點前移走「國殤之柱」,否則會被視為放棄。時光飛逝,呢支好多人覺得好醜陋嘅一支柱,唔經唔覺就咁棟喺港大黃克競樓平台成23年。講真,支咁嘅柱矗立喺度近四分一個世紀,都唔知有冇破壞港大嘅風水,依家先話移除,都算後知後覺!
呢支柱原創人係一個丹麥雕塑家高志活,喺1997年借出呢條柱予支聯會,畀佢放喺香港作永久展覽,其後1998年港大學生會交由全民投票通過喺校園「永久」豎立呢碌柱,翌年6月4日由港大學生會運去大學校園擺到依家。高志活曾喺2013年來港修葺呢支柱,更重新髹上橙色。據講係回應「橙色運動」喎!換句話講,呢碌柱完全充滿政治色彩,放喺做高深學問嘅大學校園,根本就係格格不入!
呢!支聯會清盤人蔡耀昌指港大嘅要求唔合理,促港大繼續畀呢碌咁醜陋嘅柱喺港大展示,以體現港大對自由與公義等價值嘅堅持喎!碌柱嘅原創人高志活仲向傳媒發聲明,指已委聘律師向港大發出律師信,要求召開聆訊云云。佢仲強調,若雕塑因此被破壞,校方有責任作出賠償。阿哥,呢啲咪叫做惡人先告狀囉!香港寸金尺土,畀你碌柱豎喺度20多年,都冇同你計租金喇!依家叫你搬走啫,就咁Q多聲氣!
講真,當年港大學生會夠惡,校方畀支咁嘅柱進駐咗咁耐,真係有口難言,硬食呢碌「藝術之柱」。喂,你估支柱係「定海神針」咩?佢只不過係支「攪屎棍」,農家施肥就需要啫,堂堂大學要來把鬼咩!依家港大揸正來做,老虎唔發威當病貓,今年7月,港大聲明同學生會割席,唔承認其地位,隨後更收埋其會址。港大回應傳媒查詢時都聲大大有貨賣,指有關展品屬於一個校外團體,而有關團體已進入解散程序,大學根據風險評估及法律意見,要求團體將展品移走!
港大要移走呢碌醜陋之柱,合情合理合法之至。嗰位高志活一味靠吹,又話乜嘢「藝術永存」,再一味靠嚇,又話要重新製造一碌柱要花3年,估計要120萬歐元,即約1,000萬港元!妖!話夠一個億啊笨!呢碌柱睇多眼都發噩夢!功夫茶忽然有個「得意的想法」,既然條友高志活咁鍾意碌柱又咁多「聲氣」,港大不如抵諗啲出錢打包送條柱返丹麥畀佢,當送瘟神咁送,等佢放喺自家後花園慢慢欣賞!之不過藝術呢家嘢就唔係個個識,有人就話「當代藝術就係一坨屎」!說不定佢鄰居見到碌柱發噩夢,覺得似篤嘢要佢快啲搬走,否則告到佢甩褲!「藝術永存」喎!撞鬼你喇!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500