政情：起樓點加快？ 陸頌雄：先搞基建

陸頌雄指出，欠缺道路或鐵路嘅新界地區嘅地積比率通常只得一倍，之不過喺鐵路站附近，就可以提升至4倍以上、甚至7倍都得，所以話房屋發展好多時都要基建先行。之不過，政府喺呢方面真係做得好慢，譬如講咗好耐嘅增建洪水橋站就要預計9年之後先至竣工。

佢又話港英時期嘅新巿鎮發展，由概念研究，去到落實建屋，通常只花6、7年，但依家嘅新發展區，動輒十幾廿年，真係蹉跎歲月。陸話喺完善選舉制度後，立法會料冇人拉布，政府唔好再搬咁多藉口喇。