要聞港聞

政情:醫療不足 配套欠奉 部門各自為政 長者友善政策冇影

本港人口老化加劇,有議員批評路邊有大量垃圾桶、電箱等,對長者並唔友善。 本港人口老化加劇,有議員批評路邊有大量垃圾桶、電箱等,對長者並唔友善。
本港人口老化加劇,有議員批評路邊有大量垃圾桶、電箱等,對長者並唔友善。
香港人口急劇老化,連帶勞動力亦有下降趨勢,政府能否對長者提供足夠醫療服務令人憂慮,政府有冇諗過改善環境以切合長者所需,亦甚受公眾關注。有唔少議員鬧爆政府部門各自為政兼且互相卸責,搞到長者友善政策唔見影。
立法會尋日通過「推動公共健康政策,享受優質老年生活」嘅議員議案,提出動議嘅議員陳健波話香港人平均壽命長,但若然「周身病痛」係一種折磨、生不如死。佢亦留意到本港嘅公共衞生政策不足,往往喺流感高峰期都有「逼爆」公立醫院,醫護人員疲於奔命嘅現象。佢認為市民已習慣防疫,係推動政策嘅最佳時機,促請政府提供更多運動設施、創造健康生活嘅環境等。
拆圍欄多重審批 拖到冇影
建築界議員謝偉銓關注舊區人多車多、路窄樓密,路邊亦有大量垃圾桶、電箱等,對長者並唔友善。佢話當有重建項目建議拆走部分欄柵等,往往要經多個政府部門審批,亦有互相推卸之嫌,佢早年曾倡議修改規劃標準以興建長者適切居所,但因為政府部門牽頭同協調,因而不了了之。
點樣吸引長者做運動?金融界議員陳振英建議政府可以同電子支付商合作,例如長者一日步行8,000步就可以換取20元獎勵,又話建立良好飲食習慣可以避免患上都市病,建議政府讓公營廣播機構製作多啲長者健康飲食節目。
有工會背景嘅議員郭偉强就話健康應由年輕做起,但香港工時極長,令到好多健康活動都做唔到,質疑勞工及福利局係咪有意就標準工時立法,定係「淨係睇錢」?醫學界議員陳沛然亦話香港工時同學生學習時數極長,令90%嘅中小學生未能達到世界衞生組織建議嘅運動時數。佢仲話喺立法限制最高工時,商界一定會反對,政府亦唔介入,坦言若政府唔認真檢討有關問題,即使興建幾多個運動場都唔會有用。
聽完意見 食衞局得三幅被
雖則班議員提咗咁多意見,但食物及衞生局局長陳肇始回應時都係舊調重彈,話本港人口老化係不爭嘅事實,又話政府會制訂全面同長遠規劃,包括推行10年醫院發展計劃、喺18區興建地區康健中心等支援長者需要。
郭偉强郭偉强
郭偉强
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500