飄移籌款搵命博 江嘉敏離奇封「車神」：我一星期爆7次胎

藝人何廣沛、江嘉敏、郭柏妍、李芷晴及林鈺洧等，昨日在將軍澳一間酒店出席《歡樂滿東華2022》記者會，江嘉敏透露將與羅浩銘合作表演飛車飄移：「監製最初搵我，話聽到我喺公司有個花名叫『環保大道車神』，連我自己都唔知點解有咁嘅稱號，自己手車唔辣，係安全車速。」身旁好友何廣沛即大爆見過「車神」爆胎的瘀事，江嘉敏承認並笑說：「試過喺環保大道一星期爆足7次胎！」她透露表演時由最初的乘客變成車手，開車飄移再加羅浩銘在車頂表演，難度甚高，心情緊張。她練習時不斷扭軚和拉煞車掣，笑言患上五十肩，又指公司已為表演買了保險。

而何廣沛將在蒙眼打沙包及搶包山環節籌款，他笑說：「自己拍劇都係畀人打多，唔知點解搵我做呢個項目，可能經過今次之後，有監製會搵我拍動作劇。」

至於身材出眾的李芷晴會浸冰水籌款，她擔心天氣凍加上將有冷鋒趨近，今次真的冷得騰騰震，她表示：「到時會着泳衣，外面着T恤瞓喺浴缸，其他人就淋冰水。」她透露會吃得清淡些保持身形。問到在《香港小姐再競選》得獎後，工作可有增加？她說：「真係多咗嘅，希望遲啲有機會拍劇同做綜藝節目。」