東奧男子三項鐵人賽昨晨於台場海洋公園舉行，除咗港隊代表奧斯卡成今場焦點外，場內發生嘅一次小插曲亦令賽事備受關注。事關有一艘逾10米長嘅船隻竟然喺賽事期間闖入比賽水域，令運動員嚴重受影響，事後引來批評。
三鐵賽事首個比賽項目係游水，但正當運動員準備跳入水之際，有船隻意外闖入比賽水域，打橫擋住運動員賽道。當時有部分運動員已經跳咗落水開始比賽，可謂相當危險，而剩低嘅運動員只能無奈地等待船隻開走。英國廣播公司BBC評述員即場顯得相當生氣：「我從未喺三鐵比賽見過呢種事發生，竟然喺奧運會出現，真係一團糟！」
至於全場最年輕、21歲的香港代表奧斯卡在游泳項目發揮出色，以18分35秒完成1,500米賽事，位列13，完成40公里單車項目後仍然留守第15位，奈何進入最後跑步項目氣力不繼，終以1小時48分55秒、排名33位完成比賽，但已創下香港三鐵選手在奧運歷來最佳成績。首位代表香港參加奧運三項鐵人賽的名將李致和，曾於2004年雅典奧運奪得43名。