「蒙特利爾陷阱」國民還債30年
今屆東京奧運肯定係史上財政虧蝕最嚴重嘅一屆，不過在此之前，對上一次「蝕得最甘」嘅奧運會，就要數到1976年嘅加拿大蒙特利爾奧運，當年佢哋搞奧運蝕到入肉，債務要由國民承擔，結果還足30年先至找清條數，該次奧運會被稱為「蒙特利爾陷阱」。
話說當年加拿大搞奧運會，事前舉國歡騰，政府處處大花筒，多次追加經費興建場館及組織費，事後埋數結果好大鑊，場館設施預算由最初28億美元，最後超支至58億美元，至於賽事營運費亦由6億美元增加至7.3億美元。
上述數字喺依家嚟睇冇乜嘢，但喺上世紀70年代就係天文數字，事後加拿大國民都要承擔「奧運特別稅」，一交就交足30年，直至2006年尾才還清債務。