祖高域換底褲轉運闖8強
世界1哥祖高域在法網贏得驚險，落後兩盤的劣勢下憑着「換底褲」來個大逆轉，連續12年闖入男單8強寫下紀錄，而爭取衞冕的「泥地王」拿度亦成功闖半準決賽，但賽後鬧爆賽會日光日白照開燈。
祖高域對住世界排名76位的意大利新星梅素迪，激戰了3小時27分鐘，這位塞爾維亞球星初段打得吃力，連輸兩盤「刁時」（6比7、6比7），隨後一度叫停要去廁所。結果再踏上球場即來個大逆轉，一度連贏13局以6比1、6比0及4比0反超前，令有傷在身的19歲梅素迪退賽。祖高域逃過出局命運，連續12年躋身法網8強。
賽後祖高域回應傳媒中途「暫停去廁所」的申請：「輸咗第二盤之後，我去咗換衫，返到球場之後感覺唔同晒，擊球感覺好好多，減少失誤。」其實球員暫停去洗手間，作拖延比賽及轉換節奏的策略都很常見，而祖高域隨後在個人社交網更自爆：「我去咗換底褲，冇去廁所，但感覺精神好多，之前都有呢個經驗。」
拿度不滿日波照開燈
至於爭取法網第14貫的拿度，面對另一位意大利年輕球員仙拿，以直落三盤7比5、6比3及6比0闖關。不過，拿度對賽會白天開燈有點不滿：「我真係唔明，點解晏晝4點都要開燈。」組委會解釋是為了電視轉播，但拿度仍不服：「開燈之前都有電視轉播，唔覺得有問題。」