港超聯新丁晉峰上周四宣布，後衞黃洛於6月30日約滿後，離開職業球壇，以準備7月投考消防員。「阿洛」坦言今季過後已沒有留憾：「自己能力真係唔高，識人又唔多，有機會達成踢職業嘅夢想，覺得好好彩！」
黃洛今季隨晉峰升上港超聯後即成為後防主力，各項賽事上陣15場，惟他認為足球圈始終不穩定，加上一直希望成為消防員，因此4月底已有此打算：「我覺得做消防好有使命感、好幫到人。」
黃洛近年由進攻轉為防守球員，他笑言：「開頭好多人問我係咪玩嘢， 但起碼比人知我都打到中堅。」早年擔任翼鋒的「阿洛」成名於愉園，憑出色表現獲港超聯球會香港飛馬力邀加盟，之後輾轉效力過標準流浪及凱景。離別在即，「阿洛」不忘感謝身邊人提攜之恩：「首先係晉峰一班教練畀機會我再踢超聯，另外就係愉園經理Jackal（許家銓），當然唔少得晨曦王建邦教練，我仲想多謝埋司徒文俊Sir，因為佢係第一個人執我去踢港青。」黃雋謙報道