相隔８年再入選光頭感新鮮

理文中場「光頭」顏樂楓季尾傷愈復出後，憑着出色表現相隔8年後再入選港隊，他感謝教練團隊給予機會，並會好好珍惜：「隔咗咁耐坦白講，都冇話再以入選港隊做目標，依家只係想踢好每一場波，希望唔好辜負教練嘅一番好意，幫港隊拎到好成績。」剛剛完成首課操練，「光頭」笑言感覺新鮮，適應上沒太大問題：「第一次跟番港隊操練，好多嘢都唔識，好似嚟到要攞衫，或者出到去要做啲咩，開頭都有少少緊張，但練波後見番好多熟悉嘅面孔，就慢慢適應番個節奏。」主教練麥柏倫亦對「光頭」今季發揮非常滿意，大讚他是一名勇士：「我好鍾意佢呢類球員，只要上到場佢就會交出所有，永遠唔會放棄，正正係目前港隊最需要嘅嘢。」

除「光頭」外，天水圍飛馬門將梁興傑同樣事隔多年再度入選，他坦言非常高興，並表示已準備就緒，隨時可以上陣：「其實入得決選名單，自己就會隨時預備上場，雖然葉鴻輝可能係首選，但我都唔知教練個安排，所以一定會準備好。」

安永佳期望同麥帥合作

費蘭度因傷退選後，大軍中首度獲徵召的「入籍兵」，只餘迪高及基頓兩人，迪高表示能代表港隊出戰感到開心，會盡力幫助香港隊取得佳績。至於首度躋身大港腳的安永佳亦相當興奮，指代表港隊一直是自己目標，期望與主教練麥柏倫的首次合作：「佢球員時代已經好出色，做教練當然都係啦！我之前都講過我好鍾意佢，好興奮可以同佢一齊共事。」