Mark完美斯沙維成個散晒
為爭取衞冕港超聯冠軍，及衝擊「亞冠盃」這項亞洲頂級賽事，傑志今季作出不少矚目收購。其中羅致具逾150場西甲經驗的巴爾拿，可謂盡顯「藍鳥」誓要闖一番成就的決心。今集《新兵報到》請來這位曾在歐洲頂級聯賽留下過腳印的西班牙中場，一談過往的經歷和成為傑志球員的期望。
拉馬西亞理念取得皮球 主導球賽
Q：2003至2007年期間，您曾經喺巴塞隆拿青年軍受訓，首先請您簡述當年嘅經歷。
巴爾拿：喺拉馬西亞度過嗰5年，我感到好幸運能擁有一班優秀嘅隊友同教練，佢哋嘅足球理念非常清晰，就係「取得皮球，主導球賽」！由控球開始進攻，防守時個思維都係要搶到個波。點解？因為足球就係要將個波擺入網，如果對手冇波在腳就冇機會進攻，呢個係最簡單嘅方法去形容巴塞足球。
冇同哥帥合作過
Q：執行巴塞足球最出色嗰位教練，非哥迪奧拿莫屬，咁您青年軍嗰陣有冇同佢合作過？
巴爾拿：好可惜冇！（笑）當佢正式教巴塞一隊嗰陣，我已經去咗愛斯賓奴，不過我都曾經畀「哥帥」依家喺曼城嘅助教Rodolfo Borrell教導過兩年。
最敬重恩尼斯達
Q：您出道嗰陣正值西班牙國家隊嘅盛世，佢哋仲贏過世盃冠軍，您有冇曾受到佢哋啟發？
巴爾拿：當時我已經係職業球員，所以又冇咩特別受到啟發，但我好敬重佢哋咁多位，尤其係恩尼斯達，我好欽佩佢嘅球技，但我始終好難達到佢嘅水平，因為佢真係屬於頂級！
西甲地標戰最難忘
Q：您曾經征戰過157場西甲賽事，可以分享幾件印象深刻嘅事嘛？
巴爾拿：最深刻嘅一定係我嘅西甲「地標戰」，嗰場由愛斯賓奴對維拉利爾。我哋上半場已經打少個，教練下半場換咗我落去，最終同對手踢成0比0，對我嚟講好似夢想成真咁，永遠唔會忘記呢一日！
入選最佳11人
Q：可以講多單有趣嘅事嘛？
巴爾拿：當然可以！2009至10年球季，當時愛斯賓奴由普捷天奴執教，有一場波對哥迪奧拿領導嘅巴塞隆拿。我認為嗰陣嘅巴塞係史上最強，而嗰場波我防守嘅對象係沙維同美斯，踢完場波後我成個人散晒！但我哋表現非常好，對方幾乎射唔到一腳波，最後我哋竟然逼和巴塞0比0！賽後我仲畀法國報章《隊報》選入嗰星期嘅歐洲最佳11人添！
冇同美斯不和
Q：喺2013年華歷簡奴對巴塞隆拿嘅賽前，您同美斯未有互相握手，外界曾揣測您同佢不和，請問您可以講番當年嘅情況嘛？
巴爾拿：當時只係一個誤會，可能因為之前一次交手比賽非常緊湊，我哋有啲碰撞，但嗰場波我哋實際上冇任何拗撬，或者佢之後有少少嬲咗我（笑）。我同美斯嘅關係就好似普通對手咁，我雖然唔係佢嘅好朋友，可能只係「Hi Bye Friend」，但至少我同佢之間冇任何問題。
亞冠經驗循序漸進
Q：您曾經為墨爾本勝利踢過「亞冠盃」，依家有機會為傑志再戰呢項賽事，有咩目標？
巴爾拿：「亞冠盃」係一項好有競爭性嘅比賽，我諗法係循序漸進，首先打第一場波我哋個目標係要贏，先再諗第二場，但前提我哋每一場之後都要有所提升，然後一場一場去挑戰。
靠傑志捧盃圓夢
Q：喺您嘅職業生涯從未贏過冠軍，今年嚟到傑志，贏錦標係咪您其中一個目標？
巴爾拿：係！當我12歲時曾經贏過青年錦標，但直至踏上職業足球就從來冇贏過，因為你知道喺西班牙踢波，如果唔係踢皇馬或者巴塞係好難贏到，所以我對冠軍一直都好渴望（笑），希望喺傑志贏到聯賽冠軍達成心願！
加維蘭係我「情人」
Q：您同傑志嘅隊友相處咗接近4個月，有冇邊位球員係同您感情最要好？
巴爾拿：加維蘭！佢係我嘅「情人」（笑），由第一日嚟到傑志開始佢就幫助我，我感謝佢為我做嘅一切，同埋佢都係我嘅鄰居，所以我哋經常喺埋一齊，佢就好似我嘅兄弟咁！
文：黃雋謙 圖：鄧曉欣