絕對信心做12碼劊子手
謝朗軒一向以踢法多元化而聞名，這項特質亦令他深得飛馬主帥郭嘉諾喜愛。此外，他還有一項「殺手鐧」：「由細到大對射12碼都有好強嘅信心，其實外界都知道我淨係會射一個方向。」不過，即使對手早已洞悉先機，仍然束手無策，他以今屆「菁英盃」對理文一仗的12碼入球為例：「射前對手都有嘗試影響我，但我都唔會擔心，因為只要個波射得快，就算龍門知道都唔會救到。」
主理極刑能力佳的優點，更是讓「嘉諾Sir」開始認識謝朗軒的契機。還記得3年前舉行的「省港盃」次回合，香港隊造訪「東校場」戰至120分鐘與廣東隊打成2比2，須以12碼分勝負，「謝朗」正是第5輪的「劊子手」。「佢換我出去嗰陣已經預咗我射第5個，老實講點都有壓力，但慶幸腦入面嘅畫面，一直都係由踏步到入波嘅連串動作，從來冇諗過自己會射失，最後亦都冇令佢失望，幫香港贏番個冠軍。」