加盟天水圍飛馬做埋人夫 謝朗軒孭到飛

自18歲與東方簽下職業合約後，謝朗軒曾經歷多年外借歲月，黃大仙、夢想駿其、理文流浪，這些球會他都留下過腳印，更累積近70場港超經驗。2018至19年球季，「謝朗」終於一嘗為母會披甲的滋味，適逢當年剛為港隊在亞運會殺入16強，他野心勃勃的希望在球隊爭一席位。然而，該季他僅上陣8場，「當以為自己有能力爭下嘅時候，先知原來喺大會嘅競爭真係好大，未用到我嘅話可能就係成季坐喺度。」

嘗透冷板無損足球火

「踢波嘅回憶係要自己落場爭取番嚟，而唔係嗰年喺大會攞到咩冠軍，但其實根本冇分踢。」板凳的冰冷感，「謝朗」早已嘗過夠，卻無損他對足球的愛火。在席廂凝望着隊友打拚的畫面，更令他看清自己的定位：「以前會諗點解唔係踢最好嘅位置，但呢幾年就發覺係要以大局為重，以球隊嘅成績為首要，唔再係我想點踢就點踢。」

「喺個名單數落去，原來我係球隊入面年紀第4、5大嘅華人球員，對落一班已經係千禧後！」轉眼間，下月6日「謝朗」將滿26歲，今季加盟天水圍飛馬，他希望大眾不再視他為年青球員，「起碼會覺得我係一個開始孭到飛嘅球員，能夠成為球隊贏波關鍵。」隨着經驗的累積，他察覺到漸漸有後輩向其請教球技上的知識，「我畀佢哋嘅感覺係，『謝朗』算係有經驗嘅球員，可以分享到意見畀佢哋。」而他亦會在訓練期間主動帶動士氣，激發隊友意志，擔當起領導的角色。

成家後更專注事業

令「謝朗」變得成熟的，除了對足球的熱愛，還有對婚姻的承諾。去年12月，「謝朗」正式與拍拖近4年的Hinman共諧連理，「其實一齊咗年幾已經有結婚嘅共識，我哋經常傾將來計劃，都想組織家庭、生小朋友。」由男朋友轉變成「人夫」後，謝朗軒坦言新身份未有為他帶來太大壓力，反而是一道動力驅使他繼續專注事業。「喺有機會踢職業嘅時光盡力表現到最好，唔好留有遺憾。到將來有小朋友，可以話畀佢知爹哋以前有幾叻，呢個都係動力嚟。」謝朗軒欣然的說。

因疫情關係，註冊當日他和太太未有籌辦隆重儀式，婚宴亦延至5月舉行。一向與老婆性格相似、不愛鋪張的「謝朗」表示，多得對方多年來的支持和體諒，他才得以全力在足球場上拚搏：「多謝老婆一路嘅配合，佢會知道我練完波後身體攰，願意留喺屋企陪我。飲食上佢都會經常提醒我，管理我嘅健康作息，對於我嘅足球事業都好有幫助。」