美斯早前喺西甲對華拉度列，射入1球，為巴塞隆拿累積入644球，打破巴西球王比利保持嘅「單一球會入球紀錄」，其中有份贊助美斯嘅啤酒品牌，就搞搞新意思贈興，送出644支特別版啤酒畀160位曾被美斯射破十指關嘅門將。
呢160位「受害者」之中，前華倫西亞門將迪亞高艾維斯失最多波畀美斯，達到21球，所以佢獲贈21支啤酒，佢現時效力巴甲球隊法林明高。而前皇馬鋼門卡斯拿斯亦曾經17次被美斯射破大門，所以有17支啤酒，馬體會門將奧比歷有10支。
車路士門將阿列沙巴拿加都有份，因為佢效力畢爾包期間，都有兩次被美斯攻入大門，甚至祖雲達斯門將保方都獲得兩支啤酒，佢曾於2017年歐聯被美斯射入兩球。呢班「受害者」一啲都唔介意，更紛紛喺社交網答謝，並恭喜美斯破紀錄。