願意支付周薪516萬
巴拉基話：「如果美斯真係離開巴塞，絕對有機會去車仔，車路士財力雄厚，有足夠資金簽到佢，當然球員意向先係決定因素。」雖然曼城領隊哥迪奧拿同美斯關係極好，但有傳管理層認為美斯已經33歲，唔值得為佢開出天價薪酬合約，反觀阿布拉莫域就願意以50萬鎊（約516萬港元）周薪合約，氹美斯過檔。巴拉基同時分析，巴黎聖日耳門及祖雲達斯等歐洲豪門都有興趣簽美斯，所以即使曼城有哥迪奧拿呢張「人情牌」，都唔一定會成功。
事實上車路士今夏瘋狂擴軍，用咗2.3億鎊（約23.7億港元）收購夏維斯、迪姆華拿及芝維爾等多位猛將，可見阿布仲有心搞波，為打造一支金鑽大軍，重金爭奪美斯完全唔奇。