馬納當拿入土為安，嚟緊開始遺產分配程序，西班牙《馬卡報》報道，佢留低可計算遺產約有9,000萬歐元（約8.34億港元），另外仲有幾架名車同幾間大屋。不過落葬唔夠24小時，一個自稱係馬納當拿私生子嘅男子，要求法院開棺留住球王嘅屍體，以便驗證DNA以確定其身份，睇嚟一幕爭產風暴無可避免。
呢位叫聖迪高羅拉嘅19歲後生仔，佢阿媽係一位女侍應，2006年23歲時死於肺癌，聖迪高羅拉之後由媽媽嘅男友養大。「阿媽去世時當住好多律師面前，同我講我係馬納當拿個仔。」
聖迪高羅拉話佢絕對唔係為錢：「我只係想知道自己係邊個，我知道（開棺）會引起好大爭議，但唔咁做，邊個會攞佢嘅DNA畀我？」4年前聖迪高羅拉曾經公開自認係馬納當拿嘅仔，但冇得到球王回應。
雖然馬納當拿生前講過打算捐出全部財產，不過由於佢係心臟病猝逝，法律定明子女可繼承當中3分2財產，只要係佢嘅後人就有份。不過問題係到底馬納當拿有幾多子女，佢早年講過只有元配拉芬妮所出2名女兒係佢後人，之後承認喺效力拿玻里時「製造」嘅私生子施拿加，到近年再認埋私生子小迭戈、私生女夏娜及7歲嘅費南度。
除咗上述6名子女可以分身家，據報馬納當拿喺出面仲有6名私生子女，當中有4人係佢喺古巴居住時及戒毒期間所生，年齡介乎19至24歲，呢班球王仔女理論上都可以分身家。