班福特絕殺列斯聯反常僅熟

頭2場聯賽皆開「其他」波膽嘅列斯聯今場稍為「收斂」，上半場初段只有艾寧遠射被錫菲聯門將蘭斯達爾救出較有威脅，之後兩軍互有攻守，可惜雙方門將都有精彩演出，力保不失，所以踢成0比0返回更衣室。

錫菲聯3連敗零入球

換邊後雙方繼續加強攻勢，61分鐘，列斯聯嘅史超活達拉斯接應直線推過主隊門將蘭斯達爾射空門，但被基斯巴森白界前成功解圍，不過去到完場前2分鐘，列斯聯終於搵到錫菲聯缺口，積夏里遜左路傳中，箭頭班福特鶴立雞群頂個彈地波入網，連續3場聯賽都有進帳，列斯聯亦憑呢個入波小勝1比0，頭3場聯賽贏2場，表現收貨。

相反錫菲聯失去上季銳氣，開季3場聯賽全部輸晒，而且仲係今季英超唯一一支未入過波嘅球隊，賽前盛傳錫菲聯打算簽入目前自由身、曾效力利物浦嘅前英格蘭國腳史杜列治加強攻力，如果成事或者會對球隊有一定幫助。