警方調查保特生日P玩出禍？
確診新冠肺炎嘅牙買加飛人保特，繼續有麻煩！據報道，牙買加警方已開始調查呢位奧運傳奇嘅生日派對是否違反防疫規例，「飛人」隨時被定罪。另外，保特的病毒測試結果昨晚已出，其經理人證實報告結果呈陽性反應。
牙買加政府介入調查
保特上周五（21日）度過34歲生日，舉行咗一場派對並邀請多位球星捧場，當中包括英超名將史達寧，不過從佢公開嘅片段睇到，當時出席嘅嘉賓都冇遵守防疫規定，包括冇戴口罩以及冇保持適當社交距離。
據牙買加政府規定，公眾場合必須佩戴口罩，並且禁止超過20人聚會，抵達牙買加之後要接受14天隔離，牙買加總理霍爾尼斯表示：「警方正調查此事，冇任何人得到豁免或者獲得特殊待遇，所有人對社會都有責任。」衞生部長杜夫頓補充：「依家公眾都知道，保特嘅檢測結果呈陽性。根據規定，無論任何人都要接受調查，再去追查密切接觸者。我哋嘅調查唔會偏袒，法例係每個人都要遵守。」最終保特會否被警方起訴，則有待公布。