陳晉一：Ｕ23集訓獲益多
香港23歲以下足球代表隊的最新一輪集訓早前已經圓滿結束，代表隊成員在賽馬會香港足球總會足球訓練中心完成了持續多周的訓練，令陳晉一餓感盡消。
有份參加香港23歲以下代表隊集訓的陳晉一（圖），他認為今次訓練的內容對於一班年青球員有豐富的收穫，「其實經過過去幾個禮拜嘅練習，自己嘅狀態同埋體能狀況都開始循序漸進咁上升，尤其係喺教練逐漸提升練習嘅強度底下，無論喺傳波嘅質素或者用波嘅速度都有所要求。」
「阿一」又坦言因為疫情關係，全部U23隊友在過去幾個月都沒有踢波，所以大家在今次U23的訓練入面，自然都顯得十分「餓波」和積極。「喺過去幾個月裏面，無論我哋點樣自行練習，其實都只係為咗保持本身嘅基本狀態，冇乜太大嘅競爭性。始終球員渴求嘅係有競爭性嘅練波或者比賽，而唔係單單自行練習，所以我相信除咗我之外，其他每位球員都好希望盡快有機會，重新踏入足球場上比賽。」
期待亞協盃大展拳腳
展望未來，「阿一」對本地賽事的重新展開十分期待，另外又急不及待在亞協盃分組賽裡面，為傑志大展拳腳。「其實我都有留意到亞協盃分組賽嘅最新形勢，覺得傑志本身實力唔錯，再加上依家分組形勢都算理想，所以我哋出線係有唔錯嘅機會。無論係為球會本身又好，為香港足球都好，抑或為自己也好，亞協盃都係一個好好嘅比賽舞台，所以我都好期待呢個賽事嘅展開。」