對於今季季初因十字韌帶重創而要接受手術，缺陣了一段長時間的林樂勤（Jordan）而言，早前能夠參與香港U23代表隊的首課操練，可謂意義重大。
「呢日係我做完手術之後，第3次掂番波，同埋好開心可以再嚟香港隊練波，又可以同啲由細識到大嘅朋友一齊踢波，所以好高興。」缺席港超比賽多時的Jordan，收操後作出感言。
「其實當初受傷後，我就知道將要遇到一連串嚴峻嘅挑戰，但從冇當受傷係一場大災難。仲記得第一年踢港超嗰陣，自己表現算唔錯，但係到第二年就冇乜上陣嘅機會。受傷同冇得踢，喺我心目中其實差唔多，因為始終都要樂觀去面對，畀心機做Gym同操練，令自己可以重新企番喺球場。」Jordan果然性格樂觀兼充滿正能量。
Jordan提到作為一個職業運動員，心態一定要正面，他說：「如果冇得落場就埋怨教練，比賽受傷就怨天怨命，咁樣其實係冇作用。因為作為運動員，最幫到自己嘅就係自己。正如你想贏對手，首先要贏咗自己一樣。對我嚟講，受傷只係我運動員生涯其中一個挑戰，而我需要做嘅，就係徹徹底底克服佢！」
曾經代表香港參加過去兩屆「亞洲足協U23錦標賽」外圍賽，Jordan就講到明話好希望可以入選到U23決選名單。「幾年前自己第一次參加呢個賽事，仲記得當時外圍賽係喺北韓踢，同組對手有北韓、老撾同中華台北。結果我哋以三戰一勝兩和不敗嘅成績完成小組賽事，差少少就出到線；至於上屆喺蒙古舉行嘅外圍賽分組賽，港隊成績唔理想，無緣晉級。由於下一屆係自己適齡參加嘅最後一屆賽事，所以我希望可以入到選， 幫助球隊帶到啲驚喜畀香港嘅球迷。」