加維蘭米基爾轉會續戰港超聯

先講今季嚟港超加盟愉園嘅前西班牙青年軍代表，兼2008年「U17歐國盃冠軍」功臣嘅加維蘭。佢用14場正選兩場後備入10球嚟證明自己，叫嗰啲季前話佢28歲都肯嚟香港，仲要踢隊青春班仲唔係水貨嘅人，跌到一地眼鏡碎。原定喺5月底返西班牙探家人嘅Manu，依家唔走喇，因為佢會開始接受新東家傑志，幫佢安排喺港超重開前嘅訓練。唔知加維蘭喺蘇沙、鄭展龍同基爾頓等新隊友支援下，下半季可以為傑志射入幾多球呢？

基華尼頓續約理文

日前正式喺球隊Facebook專頁公布，拉高域、加維蘭、馬希卡歷同摩域治將會離隊嘅愉園，據講都簽咗同傾緊幾位今季喺佳聯元朗表現出色嘅球員，今季喺法比奧引薦下來港嘅進攻中場米基爾，嚟緊就會接替馬希卡歷，成為「快活谷」中場指揮官。米基爾腳法秀麗得嚟攔截亦夠硬朗，愉園戰術注重中前場逼搶，啱晒佢發揮啦！同樣由法比奧介紹嚟香港嘅基華尼頓，擁有高速同純熟嘅盤扭技巧，開季理文大爆發，呢位森巴翼鋒功勞極大。所以喺佢返巴西前，理文已經開咗續約條件畀佢，而佢亦已揮筆留效。

加維蘭及米基爾(圖)分別轉會傑志和愉園，繼續在港超聯獻技。

南韓「好波之人」金承龍暫未有港超球會招手。（和富大埔Fb圖片）

金承龍巴辛未有着落

隨住和富大埔唔玩8月中嘅港超復賽，之前話會留隊嘅金承龍，同好多「綠戰士」嘅隊友一樣，加入失業大軍。其實和富大埔中，都仲有有心人，想幫啲踢得、有表現嘅球員落班，但聽講問咗好幾間球會，竟然都對金承龍冇乜興趣，認真走寶。希望11月新球季嗰陣，會喺新上嚟嘅球隊見到「金先生」啦！

對於巴辛嚟講，可以話係生不逢時！點解咁講？同樣係嚟自阿根廷，亞哥斯達上季喺夢想FC表現出色，今季季前就獲理文收歸旗下；巴辛今季喺標準流浪踢13場入12球，據聞到呢一刻都冇會搵過佢，真係估唔到。下半季唔見，咁新一季會見喇啩？標準流浪總監李輝立就話，如果巴辛冇第二間會斟佢，而佢又想繼續踢港超嘅話，佢都好樂意簽番佢，仲會加啲人工添。加人工？我冇聽錯吖嘛？

專欄輪住嚟

大頭