港超球員休戰期間仲有咩做？冠忠南區前鋒夏志明、中場陳肇鈞、後衞許宏鋒、和富大埔後衞唐道碧（Toby）、香港飛馬後衞曾健晃，近日就約埋一齊出海釣魚。夏志明（James）受訪時表示，佢哋幾個人入面，其實得陳肇鈞同許宏鋒有釣開，就連James自己都未釣過，不過James試完覺得好好玩，仲Send咗張相大晒自己嘅魚獲。
「一放線就有魚咬，真係幾好玩，我諗我哋每人最少釣到10幾條，收穫非常豐富！」跟住佢喺Instagram拍低咗唐道碧跳落水嘅片段，究竟咩事搞到佢要落水？James解釋，嗰日佢哋講好咗，邊個釣嘅魚最細條，就要被罰跳海，Toby就係輸嗰個，佢索性打個後空翻完美插水，哈哈！玩還玩，足球員都係小心啲好喎！