滑冰女神馬曉晴隔離悟人生

用「好匆忙」來形容Maisy確實相當貼切，18歲前每日都將時間握得緊一緊，兼顧學業之餘也要為每天數小時的冰上及體能訓練擠出時間。升讀麻省大學後，Maisy更為自己定下希望用兩年時間完成大學的時限，仿佛連讀書也很「趕時間」！Maisy滿有計劃地表示：「原本諗住20歲比別人早兩年讀完大學，可以利用多咗出嚟嘅時間做啲自己鍾意嘅嘢，但最後都係決定趁住自己仲年輕，不如把握時間讀埋個碩士課程。經過努力順利考入讀原校嘅碩士運動管理，我覺得好開心，因為呢個科目在全國可以話係數一數二，將用一年時間讀完呢個課程，然後希望將呢啲知識帶返港，貢獻同回饋香港體育界！」

突然由美返港打亂部署

然而，一場疫情卻打亂了Maisy的完美人生規劃：「所有嘢都嚟得好突然！仲記得喺3月13日，我哋全校學生收到email，話要立即停課同埋要盡快搬出學校宿舍以避疫情，咁我惟有即刻book機票走，但真係好趕，甚至嚟唔切同一啲感情好好嘅老師、同學講Bye Bye就要走。我心諗可能以後都未必有機會再碰到面……經過今次，令我體驗到要珍惜眼前所有嘅人同事。」

但講到最大失落，Maisy直言是失去了具意義的畢業禮：「喺中學畢業時因要穿州過省比賽，令到我無法去準備個畢業禮而感到失望。原本我很期待大學嘅畢業典禮，但今次又要取消，真係有啲傷心。雖然畢業禮將會改為網上用ZOOM舉行，但相比起同成班同學及親友一齊喺校內嘅足球場上行畢業典禮，自己喺屋企睇ZOOM會勁唔開心囉，惟有再期待下年嘅碩士畢業啦，希望到時能順順利利！」

認清目標學業放首位

Maisy返香港後也有按規定居家隔離14日，但在這兩星期卻絕不空閒：「雖然要強制留喺屋企，但唔代表我有時間停低落嚟，因為我仲要用ZOOM去完成課堂。由於係按美國時間上堂，因時差正正係香港凌晨後先開始，都真係幾辛苦。」雖然如此，Maisy笑言在隔離期間已「無咁忙」，更有時間去深思一些平日忽視了的事、認清目標：「好似之前一直想學彈夏威夷結他Ukulele，希望可以試吓自彈自唱，結果喺今次隔離時間有機會上網跟住學。不過，最大得著係令我更珍惜同屋企人嘅關係，因為過去日日忙住訓練加上近兩年更為咗埋頭讀書，真係好少有機會陪佢哋，而今次『居家令』就一次過補番晒，我哋亦多咗溝通。」

Maisy續道：「另外，我亦因為疫情好耐無去過冰面練習，雖則好懷念以往一日訓練好幾個鐘頭嘅時光，但沉澱後諗清諗楚自己嘅目標，呢幾年對我嚟講學業會放首位，其他嘢都係等讀完書先算！」