港超「東瀛四子」，和富大埔中村祐人、南華伊藤紘平、冠忠南區佐佐木周同川瀨浩太，日前公布其首部訓練秘笈後，觀眾反應非常熱烈，所以佢哋繼續推出操練短片，鼓勵香港球迷堅持抗疫信念。
中村早前喺Instagram發布佢同伊藤紘平嘅訓練過程，佢哋兩個分別側臥並單手支撐身體，另一隻手就推向對方，率先推跌對手就贏。片中所見伊藤嘅平衡力欠奉，中村只用3秒就KO咗佢，睇嚟佢都要練多啲喎。另一邊廂，「南區孖寶」佐佐木周、川瀨浩太，就示範一組訓練腿部肌肉嘅動作，佢哋兩個單手捉住大家，然後單腳蹲低再起番身。短片所見，兩位動作同步進行，睇嚟嚟緊為冠忠南區比賽，佢哋一定非常合拍啫！