杜度歎南美美食解鄉愁
唔少喺香港搵食嘅巴西足球員，最近已經暫時返番家鄉同屋企人團聚，惟獨和富大埔「森巴」後衞杜度（Dudu）仍然留喺香港。佢表示如果巴西疫情惡化，就索性留喺度等8月球季重開，不過首要喺6月前獲得一紙新約，先可以延續佢嘅工作簽證。Dudu日前受訪時透露，非常滿意自己今季表現，對留喺香港踢波感樂觀：「雖然只係踢咗半季，但我差唔多打晒所有比賽，仲入到5球，有信心好消息即將會來臨。」
食完牛扒飲巴西莓沙冰
橫掂都係等，不如趁疫情稍為緩和出街Chill一Chill。Dudu日前就到中環食好嘢，不過本來想幫襯嘅巴西BBQ餐廳，因為禁聚令而暫停營業，惟有搵間阿根廷餐廳鋸番塊靚牛扒先，貪佢都係南美出品！
食完正餐，Dudu醒起附近有間食巴西甜品嘅鋪頭。佢仲介紹咗一樣用巴西莓整嘅美味食物畀記者：「Açaí（巴西莓）盛產於巴西東北部，近亞馬遜森林附近好常見，巴西人鍾意將呢種莓壓成汁，再同沙冰溝埋一齊食。你哋都應該試吓，因為係好健康嘅食品，對消化系統尤其有益，不過記得唔好落太多糖喎！」記者聽到呢番話當然有買嚟試吓，結果味道又真係唔錯，酸酸甜甜，又有生果同殼物做配料，爽脆口感同Açaí沙冰形成強烈對比，但又非常之夾，Dudu真係冇介紹錯喎！
黃雋謙報道