熱刺南韓球星孫興民回國接受軍訓，成為傳媒焦點，有韓媒將佢喺軍訓期間嘅最新相片曝光，剪咗平頭裝嘅老孫睇嚟精神奕奕。
由於疫情關係，英超停擺，孫興民藉住呢段時間返南韓濟州服兵役，佢喺上周一已經到濟洲島嘅海軍陸戰隊第9旅第91營訓練中心，接受為期三個禮拜嘅基礎軍事訓練，老孫之前已經呼籲球迷唔好去睇佢軍訓，避免人群聚集；上周末韓媒就刊出老孫嘅軍訓期間相片。
從相片中可以睇到老孫已經按照軍人嘅標準，頭髮剷咗小平頭，呢張相睇嚟應該係合照，不過公布就只係CUT咗孫興民嘅一邊出街，老孫着住紅色運動衫，紅色係南韓海軍陸戰隊嘅顏色，左胸仲印有老孫喺軍訓期間嘅見習人員編號139。
據韓媒報道，孫興民今次軍訓期間嘅訓練項目，包括心理教育、負重24公斤行軍6至7公里、投擲手榴彈、刺刀格鬥、實彈訓練及步操等等，待軍訓結束之後，孫興民將獲得二等兵軍銜，並喺今後嘅34個月之內，完成544小時嘅藝術、體育義務工作。