寶釵徵打機達人備戰「網賽」
加拿大網球Babe寶釵又有新搞作，繼早前公開話為抗疫籌款同粉絲約會後，最近喺社交網徵求「打機達人」，搵粉絲幫她為即將開打的馬德里公開賽熱身。
馬德里賽會早前宣布今屆會改以電競形式比賽，搵嚟職業球手參賽，同樣設有獎金。身為「KOL」嘅寶釵自然報咗名，更喺社交平台約戰：「邊個想對賽，就加meeee bouchard_vpro！」
拿度梅萊都落場
呢個別開生面嘅比賽今日就開打，日前已經進行抽籤，男子組方面拿度同梅萊都會「落場」，上屆美網女單冠軍加拿大嘅安德莉絲高，及已退役嘅「丹麥甜心」禾絲妮雅琪等則會參戰女子組。比賽都會有直播，男女子冠軍可獲15萬歐元（約126萬港元）獎金，得主可自行決定捐唔捐獎金幫低排名球手，而大會亦宣布會捐出5萬歐元（約42萬港元），以助抗疫之用。