有留意本地波消息嘅球迷朋友都應該知道，好多外援球員就算未完約，球會都已經盡早安排佢哋離港返祖家。好似理文咁，走得嘅同想走嘅都走晒咁滯，依家只係剩番亞哥斯達同沙普夫仲喺度。據講亞哥斯達係選擇唔走，繼續留喺香港；但係沙普夫就唔係喇，佢都不知幾想返老家烏克蘭，只係佢走咗4次都未走到啫！吓？4次！有冇咁慘呀！
由於烏克蘭封咗機場嘅關係，沙普夫一早就知道返屋企呢條路好難行，原定計劃係先飛去白羅斯嘅明斯克，再喺嗰度搵老友幫手，車佢去白羅斯同烏克蘭邊境，經陸路返烏克蘭。雖然咁轉折，但為咗返屋企都要啦！點知，淨係想飛去白羅斯都搞唔掂。
話說沙普夫本來係今個月15日飛嘅，但臨飛之前幾日，收到航空公司電話，話班機取消咗。無計啦！搵過第班18日飛嘅，點知，轉吓頭都話取消埋。咁搵第二間航空公司又點，18日有喎，掂啦！整鬼去到18日朝早，收到航空公司電話，話根據當地部門指示，唔畀沙普夫上機，結果都係走唔到。
之後佢再Book機位，係上周四飛嘅，就算要先飛多哈，再去瑞典，最後先到白羅斯都好，沙普夫都冇所謂，千辛萬苦都係為返屋企。理文會方都幫晒手，飛之前每日都同航空公司聯絡，了解有冇問題；去到上周四朝早冇收到電話，呢次仲唔穩陣？點知當沙普夫喺機場Check in時，地勤人員打電話去嗰邊問，話瑞典去白羅斯班機可能取消，而瑞典嗰邊唔會畀沙普夫逗留，所以決定都係唔畀呢位理文防守中場上機，唉，扯罷啦！據講理文依然繼續為沙普夫返屋企而努力中，希望唔會刷新紀錄，因為4次甩拖已經夠晒慘喇。
大頭