林柱機抱住囡囡跑樓梯
要喺冇波練嘅情況下保持體能狀態，各港超聯球員各出奇謀，有行山快上快落，又有喺屋企做幾套體能動作。而富力R&F中場林柱機（Matt）就選擇喺屋企出面，以跑樓梯Keep住運動。不過，齋跑梯級對運動員一啲難度都冇，所以為咗增加負重，Matt就諗到條好橋：抱住個囡嚟跑！
練體能好辦法
喺林柱機嘅社交網站限時動態睇到，日前佢帶埋個囡Issa去做運動，跑跑吓Issa就伸手要抱抱，Matt就抱埋個囡一齊跑樓梯，畫面非常之有愛。事後Matt透露，Issa其實仲有個中文名，仲非常有意義：「我嫲嫲幫佢改咗個名叫林祉攸，大概意思係靜若如水。」佢又話，「祉攸」依家重大概12公斤，雖然小朋友嚟講唔算重，但抱住佢嚟跑，的確係增強鍛煉強度嘅好方法喎。