林恩許丹尼帶小朋友放電
近日足總正式宣布港超聯延期到9月復賽，唔少外援或入籍港將，都趁呢段時間返鄉下探親，但其實都有例外。傑志後衞丹尼、中場林恩許喺呢段時間就決定將一家大細繼續安頓喺香港。
日前，佢哋兩家人仲約埋一齊，喺丹尼位於西貢嘅大屋聚一聚；據林恩許嘅社交網站睇到，當日情況非常熱鬧，丹尼大囝Iago、二囝Roque同林恩許大囝Romeo坐埋一枱食飯，非常老友。而年紀較細嘅丹尼細囡Nora Mei同林恩許細囝Matteo，兩個BB就被擺埋一齊影相，畫面十分盞鬼！之後丹尼太太Maria甚至同Iago、Roque及林恩許一齊打機，對住部電視猛咁搖個樣非常搞笑，林恩許仲擺埋個好抵死嘅樣出嚟，睇嚟兩個家庭當日玩得幾開心喎！