專欄輪住嚟：青訓教練尼爾稱霸全國

1994年愉園銳意「蘇格蘭化」，一次過搵咗4、5個蘇格蘭球員嚟香港，當中包括司職中堅嘅尼爾。去到1999年先離開香港嘅Neil，5年間先後踢過愉園、東方同二合，「大頭」同佢唔止係記者同球員嘅關係，仲試過係教練同領隊嘅關係添！講緊係二合嘅預備組，佢臨走前教咗半季，蘇來強同馮振霆都可以話係佢嘅門生嚟。

依然關心香港

久唔久就問港超球隊請唔請教練嘅Neil，依家同佢老婆Christina喺美國加利福尼亞州生活，本身喺電腦程式公司工作嘅Neil，亦都喺當地著名球會West Coast Futbol Club擔任U16同17嘅教練，而且成日攞獎，仲試過稱霸全國。你咁好環境，點敢搞你呀！

尼爾有嘢同「蘭保」史泰龍一樣嘅，大家估唔估到係乜呢？就係一樣成為3個囡囡嘅老竇囉！3個女Chole（20歲）、Nikki（18歲）同Kyla（16歲）愈大愈似後生嗰陣係做模特兒嘅媽咪，真係戥尼爾開心。

一向口直心快嘅尼爾，耐唔中喺fb睇到啲有關香港嘅時事新聞片，就會喺fb留言問候「大頭」，好似：「你有冇畀人拉到？」、「你排咗隊買廁紙未？」同「你有冇中到肺炎？」，真係畀佢激死。

大頭