近排港超聯球員掀起一陣「行山熱潮」，冠忠南區前鋒夏志明（James）當然唔執輸。近日佢就去咗被譽為「亞洲第一市區行山徑」，位處香港島的龍脊（圖）鬆一鬆筋骨。James就話雖然龍脊出晒名，人流亦都相當多，但依然有佢值得欣賞嘅地方，加上可以飽覽海洋同市區嘅景觀，簡直係冇得輸！不過，James好似話會全力準備上周五舉行嘅「港超聯在家作賽」4強戰，點解去咗行山嘅？佢就咁樣解釋：「哈哈！我行山係為咗吸多啲新鮮空氣，去幫自己當日有好表現。」結果，James喺當日嘅比賽，準決賽就輸咗畀標準流浪嘅劉智樂，睇嚟新鮮空氣吸得唔夠喎！