近排港超聯球員因為賽事暫停，喺屋企避疫之餘都有玩下啲挑戰，「梁氏兄弟」梁冠聰同梁諾恆今次就搬埋女朋友出嚟玩「Couple Challenge」，不過原來玩嘅唔係遊戲本身，係玩自己女朋友！
事緣東方龍獅球員梁冠聰（大佬），同富力R&F球員梁諾恆（細佬），近日Post咗一條片上社交媒體，片中兩兄弟聲稱要同各自嘅女友做「Couple Challenge」。首先兩位一人預備咗一個注滿水嘅碗同一把遮，再將個碗用把遮頂上天花板，之後「大佬」同「細佬」各自吩咐女友Diamond同Katie，幫手接住把遮繼續將個碗頂住。隨後兩兄弟即刻扮嘢話要去拎個籃球，點知轉個頭就話Challenge完成，仲擺個抵死樣出嚟！
Diamond同Katie當堂勁無奈，但雙手仲要持續Keep住舉起。之後Diamond就大叫「大佬」將個碗攞番落嚟，Katie索性放手，搞到成碗水打瀉晒，個樣有啲嬲嬲豬添！不過事後兩對Couple都顯得相當恩愛，估唔到「梁氏兄弟」整蠱女友都有一手喎！