香港飛馬瀛男冧爆粉絲 佐佐木周點揀女友?

趁本地波「休戰」期間,再次在Facebook專頁「我撐本地波」跟球迷見面的環節《我撐同球員傾吓偈》反應不俗,繼和富大埔的孫銘謙,以及東方龍獅的梁振邦後,「大頭」邀請了一直極受歡迎、效力香港飛馬的靚仔日援佐佐木周,親自回答球迷問題。看過佐佐木周的回覆,以及他向「我撐本地波」和球迷道謝的說話,大家就會知道,一個球員受歡迎是有原因的。

Q:喺香港同日本以外,你喜歡嘅球員係?你覺得自己踢咩位置最適合?做你女朋友要有咩條件?

佐佐木周:鍾意泰維斯同阿古路,佢哋都係生得細粒但非常強壯!我鍾意同衝得撞得嘅中鋒拍檔打前面。女朋友?我希望佢煮嘢食好叻,因為食對我嚟講好重要,好易畀我感受到佢對我嘅愛。

Q:你支持邊一支日職球隊?

佐佐木周:我支持家鄉球隊奈良,佢哋依家喺第4級聯賽努力緊,哈!哈!

Q:請問你喺日本嘅家鄉,最出名嘅紀念品或者特產係咩?你家鄉近大阪定東京?

佐佐木周:我係奈良人,好近大阪。我建議你要試呢個Kakino Hazushi(柿の葉壽司),好好味!

Q:你最喜歡嘅香港足球員係邊個?

佐佐木周:所有有經驗嘅球員!好似香港飛馬嘅『肇麒』同『偉豪』咁,我可以喺佢哋身上學到好多嘢。

Q:你有計劃有朝一日成為歸化球員,為香港隊披甲嗎?

佐佐木周:將來嘅事無人會知,但我好鍾意香港,如果可以,我都想為香港足球做番啲嘢。所以如果有一日用得着我,我會盡自己所能去做,喺香港踢波真係好開心。

Q:你放假通常做咩?港超邊個後衞最難應付?港超邊個龍門最難射入?邊個係港超最佳球員?喺香港飛馬邊個同你最老友?

佐佐木周:放假我多數會去食日本菜,但只係一個人去。我咁細粒,其實對邊個後衞都難踢,要諗好多計先可以對付到佢哋!最難射入嘅應該係夢想FC龍門,因為我試過對佢哋一場波射失兩個12碼,係慘痛嘅回憶!我揀唔到邊個係最好,因為有好多好球員,亦會向佢哋學習。我好幸運,同香港飛馬嘅職球員都相處得唔錯,個個都鍾意同我傾偈,就連管理Ronald大哥都同我好Friend。

Q:你喺香港飛馬嘅演出有目共睹,你有咩想同支持者分享?或者有咩想同年輕球員講?

佐佐木周:我個人好簡單,唔鍾意輸!所以我會不停跑動,不斷去逼搶,展現自己嘅能力。我想踢得好啲,所以練波好落力,事前做足準備。足球係我證明自己嘅地方,同樣可以令一個年輕人成長,所以有機會就要全力以赴,無論眼前有咩障礙都唔可以認輸!

Q:我留意到你成日轉換髮型,其實你最鍾意咩髮型?

佐佐木周:你有咩提議畀我?踢波嗰陣,我覺得長頭髮好啱我,但現實生活打理長頭髮都幾煩,哈!哈!

Q:如果香港嘅球員有機會出去落班,你覺得邊個國家嘅聯賽適合佢哋?

佐佐木周:香港球壇其實有好多好出色嘅球員,我相信亞洲好多地區嘅聯賽,佢哋都可以踢到。去歐洲係唔係一定唔得?我覺得唔係囉,但坦白講一定唔容易。如果任何一個香港球員去澳洲或者菲律賓落班,出發前都可以問吓我呀,我會將自己知嘅話晒佢哋聽。

Q:學踢波嘅時候以邊位球員做學習對象?三浦知良?中山雅史?

佐佐木周:我一直視岡崎慎司係我嘅學習對象,我好鍾意佢嘅比賽態度,夠硬淨、聰明,而且非常強壯。當然,三浦知良同中山雅史兩位前輩,都係日本嘅傳奇,我都好欣賞同尊敬佢哋。

Q:你覺得香港同日本最大差異係咩?

佐佐木周:點講好呢?喺香港,我去舖頭或餐廳時,遇到嘅人大部分都好友善;相反,我喺日本嘅感受就唔係咁,啲人成日好似好嬲咁。

Q:你同鄉里川瀨浩太感情好嗎?你哋放假多數會做啲咩?

佐佐木周:我哋好好感情!因為喺澳洲、菲律賓踢波都一齊,嚟到香港又撞番,我哋之前放假會一齊出去食飯、行街、買嘢,好似兩兄弟咁!

Q:你有啲咩嗜好?

佐佐木周:我好鍾意釣魚,放假都會去釣。

Q:你會點比較日職同港超聯?

佐佐木周:如果逐個球員去比較,日職球員平均質素的確高好多,但港超球員普遍好爛打,而且好大隻。只要練好啲技術,醒目啲,做有水準嘅決定,咁就掂晒喇!

感言

「多謝大家留咗咁多言畀我,就算我打字打到手指頭都爛,都答得好開心同享受。感謝『我撐本地波』嘅邀請,同畀呢個機會我同球迷交流。全球依家正係艱難時刻,包括香港,大家要努力,保持微笑,希望好快再喺球場見到大家,多謝你哋!我愛你哋!」