F1每站縮1日減少聚集

合共有22個賽站嘅2020年F1，因新冠肺炎已經有8個分站跑唔到，當中澳洲同摩納哥站取消，另外6站公布延期，F1賽會表示今個賽季唔會取消，目標可以進行15至18個分站，預計6月14日嘅加拿大分站係首站賽事。

現時F1分3日舉行，周五進行2節練習，周六為練習及排位賽，周日就會進行正賽，法拉利領隊比諾托表示，佢哋向F1建議將比賽縮短至2日，將周五嘅2節練習改喺星期六早上舉行。此外，現時尾站係11月29日嘅阿布扎比站，比諾托相信，賽會可以延長賽季至下年1月，咁就會有多2個月時間編排補賽。